O vindeiro domingo 24 de abril celebramos a “III Andaina contra o despoboamento”. Será, coma sempre, na nosa aldea, en Rebordechán (Concello de Crecente). Nas dúas edicións anteriores xuntámonos ao redor de 150 persoas. Gustaríanos repetir ou mellorar esa cifra para seguir sumando e camiñando na dirección que queremos.

Compartimos con vós a información máis relevante. Se tedes algunha dúbida podedes escribirnos ao correo info@otempodaaldea.com, ou nas nosas redes sociais.

• Para inscribirvos tedes que facer un ingreso de 12€ na conta ES14 2080 5023 4530 4001 1547. No concepto poñede o voso nome seguido de “andaina Rebordechán”. O ingreso é requisito imprescindible para a inscrición e a reserva de praza. O último día para inscribirse é o 20 de abril. Se chegamos ás 200 persoas pecharemos a inscrición; queremos desenvolver unha actividade que se adapte aos nosos recursos e que resulte agradable para visitantes e veciños. Se decidimos ampliar o prazo, comunicarémolo a través das redes sociais. 
• Tamén necesitamos que completedes o seguinte formulario: https://bit.ly/3qToYUS Se non vos sentides cómodos ou cómodas coas novas tecnoloxías, podedes facelo o mesmo día da andaina. Para iso recomendamos chegar un pouco antes. 
• A cita é ás 9:00 na Igrexa de Rebordechán. No Concello de Crecente (e non no de Covelo!). A localización exacta é esta: https://goo.gl/maps/tK7x3ATGLLy
• Poderedes escoller entre dúas rutas distintas: unha longa de 18 km aproximadamente, e unha curta de 10 km.
• A inscrición inclúe avituallamento para a ruta e algo de xantar ao rematar. Tamén se fará un sorteo no que regalaremos tres libros de “Rebordechán. A nosa memoria” editado pola Asociación Cultural e Veciñal Amistade, e produtos da aldea.

Sexa a vosa primeira andaina en Rebordechán ou se repetides andaina contra o despoboamento, pagará a pena volver contemplar a ruta sobre o Miño ou dende o Coto do Vesperón, percorrer o camiño entre muíños a carón do regato ou sentar no miradoiro fronte ao antigo Balneario de Cortegada. 

Estamos seguras de que vos sorprenderá coñecer o patrimonio da nosa aldea: as súas paisaxes e, sobre todo, a súa xente.

Organizar unha andaina serve para loitar contra o despoboamento? Darlle unha dose de vida á aldea, percorrer e concienciarnos, sumar ideas e forzas, camiñar xuntas e pouco a pouco cara ese futuro que imaxinamos. Acompañádesnos?