Un falecemento, sexa onde sexa, crea un oco gris e triste nos achegados; e tamén, nas rúas polas que camiñaba, ou na froitería onde ía todas as mañás polas mellores mazás.

O peche das escolas é un dos síntomas máis claros do despoboamento do rural. A de Rebordechán hai moitos anos que pechou aínda que nós gardamos moitas das leccións que alí se explicaron. Recollemos a súa historia no libro Rebordechán. A nosa memoria.

Sempre que falamos do noso proxecto, lembramos a importancia dos pasos previos a presentar unha inciativa para a recuperación integral da parroquia. Nunha aldea sen vida, unha idea así non xorde da noite para a mañá. En Rebordechán os pasos previos foron, entre outros, loitar pola mellora das infraestruturas, recuperar festas tradicionais, e crear outras novas. Unha desas festas, que camiñou case en paralelo a O Tempo da Aldea, foi a Noite da Moura; "unha festa propia de Rebordechán, que nos permitira mesturar cultura, música tradicional e gastronomía". Xa levamos 9 edicións e xa estamos a pensar en como celebrar o 10º aniversario. 

Os millenials que medramos as aldeas nas que traballaron os nosos avós, vemos herba e mato onde hai recursos dos que poderiamos vivir. Algúns temos a sorte de que, aínda que fixemos o camiño da escola e a universidade, transmitíronnos o valor da aldea á que agora queremos volver; estamos convencidos de que estamos a tempo.

No libro Rebordechán, a nosa memoria, adicamos unha parte importante do mesmo á toponimia, para coñecer a nosa historia a través dos lugares que forman a aldea. Comezamos polo topónimo máis importante de todos: Rebordechán. O traballo é de Gonzalo Navaza, profesor da Universidade de Vigo e membro da Comisión de Toponimia da Xunta de Galicia.

O Entroido en Rebordechán comeza o sábado anterior ao oficial, coa feitura do meco. Herba seca, roupa vella e un pouco de inxenio son os ingredientes que puxemos para facer un señor ben simpático que esperou a súa queima do sábado de Entroido.

Perfeuto Ramos fai un percorrido pola nosa historia no libro Rebordechán. A nosa memoria, publicado no ano 2007, coincidindo coa celebración do centenario da Banda de Música de Rebordechán. Entre outras historias, podedes atopar a da barca da Pena, que comunicaba Rebordechán e Cortegada.

Esta porta garda boa parte da historia de Rebordechán. Cantos anos teñen estes debuxos? Que historias contan?

As campás de Rebordechán seguen a cumprir coas súas obrigas. Entre outras: espantar treboadas ou preservar cultura.

Xa vos contamos que en Rebordechán contamos con dous libros nos que gardamos unha parte do noso patrimonio. Rebordechán, unha aldea de tantas é un pequeno libro editado no ano 1.990 no que se recolle a historia da aldea, os costumes, información sobre a banda de música… Hoxe traémosvos un anaquiño da historia de Rebordechán.